Sekyu nakipagpatintero kay kamatayan, dedo

Patay ang isang guwardiya habang sugatan naman ang isa niyang kasamahan nang mabangga ng isang humaharurot na sasakyan sa EDSA kanto ng North Avenue, Quezon City kahapon ng madaling araw.

Sa inisyal na ulat ng Quezon City-Traffic Sector 6, nakilala ang nasawi na si Marbert Ras, security guard ng Bayantel Corporation habang sugatan naman ang kasamahan nitong si Romy Rivera.

Hawak naman ngayon ng pulisya ang sumukong suspek na si Jason Bautista, 21-an­­yos, may-asawa, sales agent at residente ng 63 Paz St., Morning Ridge, Caloocan City.

Sinabi ni Bautista na, dakong alas-2 ng madaling-araw, malayo pa lang ay nakita na niya ang dalawang biktima na naglalakad sa maling tawiran sa EDSA.

Binusinahan niya ang dalawa ngunit patuloy na nakipagpatintero ang mga biktima hanggang sa hindi na niya maiwasan at tuluyang mabangga.

Nabatid naman na hindi kay Bautista ang minamaneho nitong Nissan Xtrail na may plakang ZAK158.

Nahaharap ngayon sa kasong reckless imprudence resulting to homicide at serious physical injuries ang suspek. (Lordeth Bonilla)