Ina kalaguyo raw ng suspek, Grade 5 pupil nasagip sa kidnaper

Nailigtas na kamakalawa ng gabi mula sa kamay ng kanyang kidnaper sa San Fernando, Pampanga ang isang 12-anyos na Grade 5 pupil na unang dinukot sa Muntinlupa City makaraang matunton ng pulisya ang pinagdalhan sa kanya ng mga suspek.

Sa isinagawang follow-up ope­ration na pinamunuan ni SPO1 Alias Nero, mata­gumpay na nabawi ang biktima na si Jerome Rosario habang arestado ang suspek na si Frank Damayo, 50, resi­dente ng #301 Sitio San Pablo, Tela Basbagan, San Fernando.

Inginuso naman ng suspek ang ina ng biktima na si Edna Rosario, 44, na umano’y siyang nag-utos sa kanya na sunduin ang bata sa pinapasukan nitong paaralan sa Sucat Elementary School sa Sucat, Muntinlupa City noong Agusto 7 at isama na ang biktima sa kanilang lalawigan.

Sinabi pa ni Damayo na may relas­yon  sila ng ina ng biktima at nakatakda na sana silang magsama kaya ipina­sundo na ng ginang ang anak sa pa­aralan bago susunod na lamang sa kanila  sa San Fernando.

Sinasabi ng suspek na madalas saktan si Edna ng asawa nito.

Ikinaila naman ng mag-asawang Ro­sario ang pahayag ni Damayo ba­gama’t inamin ng lalaki na paminsan-minsan ay nasasaktan niya ang misis kaya pansamantala lamang silang nag­hiwalay.  (Rose Tamayo-Tesoro)