Mandatory drug testing sa LTO, pinatatanggal ni Sotto

Inakusahan kahapon ni Dangerous Drugs Board (DDB) Chairman Tito Sotto sa pagiging talamak sa korapsyon ang mga akreditong drug-testing centers na akredito ng Land Transpor­tation Office (LTO) sanhi upang makalusot ang mga positibo sa iligal na droga na aplikante para   magkaroon ng lisensya.

Dahil dito, hiniling na ni Sotto kay Department of Trans­por­ta­tion and Communications (DOTC) Secretary Leandro Men­­doza na tanggalin na lamang ang  man­datory drug tests  sa mga apli­kante ng  driver’s license  at sa halip ay gawin na lamang itong random.

Sa datos ng DDB at Depart­ment of Health, nasa 0.4% lamang ang napatunayang po­si­tibo sa iligal na droga sa mga aplikante ng LTO license buhat nang ipatupad ito na lubhang na­pakababa at hindi na epek­tibo, ayon kay Sotto.

“Ang nangyayari pa nagka­karoon ng mga lagayan.  Wala namang kukuha ng driver’s license na alam niya na positive siyang gumagamit”,  ani Sotto.

Iginiit naman nito na dapat pa ring ipatupad ang mandatory drug tests sa mga motorista na sangkot sa mga aksidente, may dati nang kaso sa iigal na droga at iba pang krimen.

Makakatulong rin ang panu­kala niya sa programa sa pagti­tipid ni Pangulong Arroyo kung saan makakapagtabi ng P300 ang isang aplikante na bayad para sa drug testing.  Malaking katipiran rin umano ang maidu­dulot nito at mabubuwag na ang mga sindikato ng korapsyon.

Sa kasalukuyang batas sa Comprehensive Dangerous Drugs Act of 2002 Section 36, nakasaad: “No driver’s license shall be issued or renewed to any person unless he/she pre­sents a certification that he/she has undergone a man­datory drug test and indicating thereon that he/she is free from the use of dangerous drugs”. (Danilo Garcia)