Hepe ng Parañaque Police namumurong masibak sa ‘motel cop’

Namumurong masi­bak na rin sa kanyang pwesto si Parañaque City Police chief, Supt. Ronald Estilles bunga umano ng kapaba­yaan nito sa kan­yang tung­kulin hinggil sa pag-aban­dona ng kan­yang tauhan sa kanilang patrol car sa loob ng isang motel, kama­kalawa ng madaling-araw sa Pasay City.

Ito ay matapos kum­pir­­mahin kahapon ni Na­tional Capital Region Office (NCRPO) chief Director Geary Barias na hindi “ligtas” sa panana­gutan si Estilles sa na­sabing in­sidente.

Ayon kay Barias, pa­rang nakahanap na rin ng “butas” para tuluyan ng ma­sipa sa kanyang pwesto si Estilles na may mahigit sa limang taon na niyang pwesto na ma­ iku­konsidera umanong “over­­staying” na.

Bukod pa rito ay hindi umano angkop sa ranggo ni Estilles ang kanyang pwesto dahil kinakaila­ngang Senior Supt. o ka­tum­bas ng full pledge colonel umano ang dapat na umupo bilang hepe ng pulisya sa anumang lung­sod ng bansa. 

Mas lalo pa umanong nalagay sa balag ng ala­nganin ang pwesto ni Estilles makaraang ma­pa­­ba­yaan nito ang kan­yang tauhan na si PO3 Jose Salazar na i-aban­dona ang kanilang patrol car ng ilang oras sa loob ng isang motel kama­kalawa ng pasado alas-3 ng madaling-araw sa Pasay City at magliwa­liw naman ang huli kasama ang tatlo pang pulis sa Miss Uni­versal Night Club & KTV Bar sa na­banggit na lungsod. (Rose Tamayo-Tesoro)