‘Bampira’ huli sa aktong naninipsip

Inaresto ng pulisya ang  tinaguriang “bampira” ng krudo matapos mahuli sa aktong sinisipsip ang laman ng tangke sa  isang nakaparadang towing truck kamakalawa ng gabi sa Muntinlupa City.

Kinilala ang ‘bampira’ na si  George Billones, 46,  jeepney driver, ng 133 Canare St., Agra Homes Village, Brgy. Puta­tan, Muntinlupa matapos itong mahuli sa akto ni Bong Mararag, 25, driver ng Centennial Auto Services.

Sinabi ni Mararag sa pulisya na  ilang linggo na niyang napupuna ang sobrang lakas ng konsumo sa krudo ng minamaneho niyang towing truck, ga­yung regular at hindi naman nagbabago ang kanyang ruta kaya’t ini­reklamo na niya ito sa may-ari ng auto services na si Mario Castillo.

Sinuri naman ng me­kaniko sa naturang auto services ang towing truck na may plakang RTZ-513 na minamaneho ni Mara­rag at wala naman silang na­kitang diperensiya upang kumonsumo ng ma­laking halaga ng krudo. Dakong alas-11 ng gabi nang ma­isipang su­riin ni  Mararag ang minama­ne­hong truck sa pinagpa­pa­radahan nito, malapit sa tapat ng kanilang bahay  at doon niya nakita ang sus­pect na mistulang bampi­rang sinisipsip ang krudo sa tangke ng ­truck na ginagawa ni Billones.

Agad niyang ipinag­bigay alam nito sa mga pulis, na nagresulta nang pagkakadakip sa naturang suspek. (Lordeth Bonilla)