Barker dedo sa pulis

Patay ang isang barker matapos itong barilin ng rumes­pondeng pulis habang ang una ay nanggugulpi ng isang ba­rangay Ex-O, kahapon ng umaga sa Caloocan City.

Si Ricardo Mayor, 34, ng #183 Makiling St., Mountain Heights, Brgy. 183 ng nabanggit na lungsod ay namatay habang ginagamot sa Caloocan North Doctors Hospital sanhi ng tina­mong tama ng .9mm sa kanang pigi nito.

Nagtamo naman ng mga pasa at sugat sa iba’t ibang bahagi ng katawan at ulo sina PO2 Robert Beleno, 35, naka­talaga sa Police Community Precinct (PCP) 18 ng Caloocan-PNP at si Abelardo Gatarin, Ex-O ng Brgy. 183.

Lumalabas sa imbestigas­yon ni PO3 Noli Albis, may hawak ng kaso na dakong alas-8:30 kahapon ng umaga nang mangyari ang nasabing insi­dente sa kahabaan ng Quirino Highway malapit sa PCP 18.

Nabatid na kasalukuyang nagpipintura umano ng pedes­trian lane si Gatarin kasama ang ilang tanod ng Brgy. 183 nang makita ng mga ito si Mayor na nagtatawag ng mga pasahero sa isang nakaparadang jeep.

Agad na nilapitan ni Gatarin si Mayor upang pansamantala itong patigilin sa pagtatawag ng mga pasahero dahil naaapakan ng mga sumasakay ang ka­nilang pinipinturahang pedes­trian lane. Dahil dito, nagkaroon ng mainitang pagtatalo sa pagitan ng dalawa hanggang sa bigla na lamang kumuha ng kahoy si Mayor at pinagpapalo sa ulo at katawan si Gatarin.

Sa pagkakataong ito, agad na rumesponde si PO2 Beleno sa insidente at tinangka nitong awatin si Mayor ngunit maging ang una ay pinagpapalo rin ng huli ng kahoy. Nang akmang ta­tayo ang pulis mula sa pagkaka­dapa sanhi ng mga tinamong mga palo ay muli itong pinag­papalo ni Mayor dahilan upang bunutin ni PO2 Beleno ang kan­yang baril at paputukan ito.

Agad na isinugod sa na­banggit na pagamutan si Mayor, subalit namatay ito habang nila­lapatan ng lunas ng mga doktor, habang sina PO2 Beleno at Ga­ta­rin ay dinala naman sa Jose Rodriguez Hos­pital at matapos lapatan ng pa­unang lunas ay kusang loob na sumuko ang pulis sa kanyang mga opisyal.