Balikbayan todas sa snatcher

Nabigong makabalik pa sa Estados Unidos ang isang balik­bayan makaraang saksakin ito at mapatay ng isang snatcher, kahapon ng madaling-araw sa Las Piñas City.

Namatay habang nilalapatan ng lunas sa Las Piñas Medical Center bunga ng isang  saksak sa dibdib ang biktimang si Felipito dela Cruz, 72, residente ng Marigold St., Pilar Village ng nabanggit na lungsod.

Samantala, arestado naman ang suspect na si Luciano Boyles, alyas Dante,  27, tricycle driver residente ng Blk. 15, Lot 11, Gloria Compound, Las Piñas City.  Batay sa imbestigasyon, dakong alas-12:30 ng madaling-araw nang maganap  ang insidente sa Pilar Road, Almanza Uno, Las Piñas City.

Bago ito, kasama ng biktima ang kanyang manugang na pumasok sa isang karinderya para kumain. Nagkataon na naroroon din umano ang suspect at pinag-interesan ang dalang bag ng biktima, subalit hindi nito magawang holdapin dahil kasama ng huli ang manugang na si Derek Mones.  Nang akmang aagawin ang bag ng biktima, hinarang ito ng manugang kung kaya’t sinak­sak na lang nito ang una bago tumakas sa lugar na pinangyarihan.

Sa isinagawang follow-up operation, ang suspect ay nadakip sa kanilang bahay kung saan nakahanda na ang mga personal na kagamitan nito para sana tumakas. (Rose Tamayo-Tesoro)