Director ng Pasay City Gen. Hospital hiniling patalsikin sa puwesto

Iginisa kahapon ng umaga sa Sangguniang Panglunsod ng Pasay City ang officer in-charge o tumatayong director ng Pasay City General Hospital makara­ ang maghain ng petition ang ma­higit sa 100 mga doktor, nurses at hospital staff ng natu­rang pa­gamutan para patalsikin ang una sa kanyang pwesto dahil umano sa masamang pag-uugali nito.

Sa ginawang pagdinig ng Committee on Law and Justice na pinamumunuan nina Coun­cilors Reynaldo Padua, Richard Advincula, Emi Calixto-Ru­biano, Ian Vendevel at Bing Pe­tallo, hiniling ng mga peti­tioners na mapatalsik sa puwesto bilang director ng ospital ang 54-anyos na si Dr. Tomas Antonio.

Ayon sa may 100 emple­yado/hospital staff, malaki ang kanilang problema sa character o pag-uugali ni Dr. Antonio na itinalaga ni Pasay City Mayor Wenceslao “Peewee” Trinidad sa rekomendasyon ni Repre­sen­tative Antonio Roxas.

Kabilang sa mga inire­reklamo ng mga nurses at doktor na nagkaroon sila ng “traumatic” experiences mula nang manungkulan sa ospital si Dr. Antonio.

Simula umano noong June 19, 2008, halos mahigit sa 134 memorandum ang inisyu ni Dr. Antonio para lamang ilipat ng ibang puwesto ang isang empleyado kahit wala sa job description ng ospital na uma­no’y labag sa panuntunan ng Civil Service at para lamang ma­bigyan ng puwang ang appoint­ment ng malalapit na kaibigan.

Nadiskubre pa na si Dr. Antonio ay hindi lehitimong taga-Pasay,  taliwas sa Per­sonal Data Sheet (PDS) na bi­nigay nitong address na #8 Hernandez St., Pasay City na tirahan ni Rep. Roxas.

Binigyan naman ng 10-araw si Dr. Antonio ng Sangguniang Panlunsod para makipag­daya­logo sa mga petitioners at ayusin ang internal problem na labis na nakaaapekto sa mga pasyenteng ginagamot sa na­turang ospital.   (Rose Tamayo-Tesoro)