Misis, kapitbahay huli ni mister sa motel

Nabuking ng isang mister na sekyu ang pagtataksil ng kan­yang misis nang masundan ng una ang huli kasama ang kapitbahay nitong kala­guyo na pumasok sa loob ng isang motel, kahapon ng ma­daling-araw sa Pasay City.  Nahaharap sa kasong pakikiapid ang nasabing misis na kinilalang si Elsa Aguirre-Cabantog, 31, mananahi, ng Pali­paran-2, Dasmariñas, Cavite at kalaguyo nitong si Jolito Fer­nandez, 47, ng nabang­git ding lugar.

Ang magkalaguyo ay dinakip ni PO2 Jordan Moreno ng PCP-6 makaraang mag­­sum­bong sa awtoridad ang mister na si Esmeraldo Cabantog, 40.

 Ayon sa pahayag ni Esmeraldo, bilang security guard, lingguhan siya kung maka­uwi ng ka­nilang bahay at ang kanyang misis naman ay mananahi sa Baclaran, Para­ñaque City. Nitong mga nakaraang buwan, naramdaman umano ni Esme­raldo ang biglang panlalamig sa kanya ng misis at madalas na nakikitang palihim na nakikipag-text sa isang lalaki.

Dahil kinutuban na may ibang lalaki ang asawa, dakong alas-5 kamakalawa ay minabuti ni Esmeraldo na hintayin ang paglabas sa trabaho ng asawa at sinun­dan ito hanggang masaksi­han ang pagta­tagpo ng ginang at kalaguyo na pumasok sa nasabing motel.  Laking-gulat naman ni Esmeraldo nang matuklasan na ang kinalolokohang lalaki ng asawa ay ang kanilang kapitbahay na si Jolito na pala­gian nitong nakakainuman.

Batay sa imbestigasyon ni SPO1 Gil Manabat, may hawak ng kaso, dakong alas-5 ng madaling-araw nang maaresto ang mga suspect sa Rotonda Lodge, EDSA, Pasay City. (Rose Tamayo-Tesoro)