Talayan case lutas na

Itinuturing na ng pulisya na nalutas na ang Talayan robbery-arson slay case dahil sa pagkakaaresto ng apat na suspek dito. 

Ito ang inihayag kahapon ni National Capital Regional Police Office Director Geary Barias na nagsabing, dahil sa pag­si­sikap ng mga tauhan ng Quezon City Police District, nadakip ang mga suspek na sina Miguel Estopa y Ybanez, 42, may-asawa, driver, ng Tanay, Rizal; Jeofrey Cerilo y Manalo, 45, ng Sto. Domingo, Quezon City; Ramon David y Hernandez, 47, tindero, ng Sto. Domingo, at Judy Ca­jontay Operio.

Sinabi pa ni Barias na ang tagumpay ng mga operatiba laban sa mga suspek sa Ta­layan robbery-arson-slay case ay nagsimula nang isang impormante ang nag­sa­bing kinausap siya ni Estopa na sumali sa isasagawang pag­nanakaw na siyang naging susi upang mabatid ang kinaroroonan ni Estopa.

Kabilang sa mga nare­kober ng mga awtoridad sa tat­long nasakoteng suspek ay tatlong uri ng packing tapes na kagaya ng ginamit sa mga biktimang napatay hanggang sa masunog.

Idinagdag pa ni Barias na ang pag-aresto at pagkaka­resolba sa kaso ay isang ma­linaw na dahilan na ang PNP ay may kapasidad na lumutas ng krimen at manghabol at magpapanagot ng mga kriminal.

Pinapurihan rin ni Barias sina QCPD chief, PSSupt. Mag­tanggol Gatdula at PSupt. Franklin Moises Mabanag sa pagkakalutas sa kaso.