OFW patay sa liposuction

Isang  babaeng Overseas Filipino Worker (OFW) ang na­sawi sa hindi pa mabatid na dahilan habang isinasailalim sa operasyon sa liposuction sa isang klinika sa Quezon City kamakalawa.

Idineklarang patay dakong alas-6:30 kamakalawa ng gabi sa loob ng Borough Medical Care Institute sa loob ng Cyber One Bldg. sa Eastwood Cyber­park along E. Rodriguez Jr. Avenue, Libis ang biktimang na­kilalang si Mary Jane Arciaga, 29, isang OFW buhat sa Dubai at residente ng Muntinlupa City.

Hawak naman ngayon ng Quezon City Police District-Cri­mi­nal Investigation and Detec­tion Unit ang limang medical prac­titioner na nag-opera sa bik­tima na nakilalang sina Drs. Lo­renzo Peregrina (cosmetic-plas­tic surgeon), Mylene Tan (anes­the­siologist) at Joel Pun­zon (sur­ geon).  Kabilang din dito ang mga nurse na sina Fiona Fran­cisco at Joanna Melissa Tabiando.

Sa inisyal na ulat ng pulisya, sinabi ng mga kaanak ni Arciaga na dakong alas-11 ng tanghali nang magtungo sa naturang klinika ang biktima upang suma­ilalim sa operasyon para sa pag­papapayat  Nagulat na lamang sila nang ipaalam sa kanila na nasawi ang biktima habang isinasailalim sa operasyon.

Isinasailalim ngayon ng pu­lisya sa awtopsiya ang bangkay ng biktima upang mabatid ang dahilan ng pagkasawi nito. 

Sinabi ni QCPD-CIDU chief, Sr. Supt. Franklin Mabanag na par­tikular na titingnan nila kung nasawi si Arciaga sa “anes­thesia overdose”.

Sinabi pa nito na base sa mga eksperto, kailangan munang sumailalim sa medical examina­tion ang isang pasyente isang araw bago operahan ito upang matiyak kung kakayanin ng ka­tawan.  Sa kabila nito, niliwanag rin ni Mabanag na sumailalim na rin sa matagumpay na lipo­suction operation ang biktima noong nakaraang taon.

Kinukuwestiyon naman ng pamilya ni Arciaga ang mga doktor kung bakit sa naturang kli­nika lamang isinailalim sa ope­rasyon ang biktima.  Bakit rin umano hindi ito isinugod sa pa­ga­mutan nang mag-kritikal na ito.

Inihahanda naman ng QCPD ang pagsasampa ng kasong reckless imprudence re­sulting to homicide habang hini­hintay ang resulta ng naturang awtopsiya.