2 katayan ng baboy sinalakay

Sinalakay ng mga ta­uhan ng Laguna Lake Development Authority ang dalawang slaughter house o katayan ng baboy na sinasabing pag-aari ng pamilya ni dating Muntinlupa City mayor Jaime Fresnedi.

Nag-ugat umano ang nasabing raid bunga ng walang humpay na rekla­mo ng mga residente ng Barangay Putatan at bukod pa umano sa sob­rang ingay na idinudulot ng mga kinakatay na baboy na umaabot hang­gang madaling-araw at water pollution na kuma­kalat sa Laguna Lake.

Malaki umano ang ipi­nagtataka ng mga   nag­reklamo kung paano na­kapagtayo ng slaughter house sa bahagi ng Laguna Lake sa kabila ng Cease and Desist order ng LLDA.

Batay sa rekord, ma­ka­ilang beses na uma­nong bumagsak sa ins­peksiyon ang nabanggit na dalawang slaughter house kung saan ay pinagmulta ito ng halos P3 milyon dahil umano sa polusyon na idinudulot nito sa lawa.

Pinamunuan ang na­tu­rang pagsalakay ni Engr. Ernesto Pua ng Pollution Monitoring Group kung saan ay kanilang ininspeksiyon ang water treatment plant patungong Laguna Lake.

Sinasabing bahag­yang nagkaroon ng ten­siyon nang ipatigil ni Councilor Allen Ampaya, umano’y pamangkin ni Fresnedi, ang isinasa­gawang inspeksiyon ng LLDA subalit agad na­ mang humupa nang pumagitna ang operatiba ng Muntinlupa City Po­lice. (Rose Tamayo-Tesoro)