Mangingisda timbog sa  pampasabog

Isang mangingisda na pinaniniwalaang sangkot sa paggawa  ng pampasabog ang nadakip ng pulisya nang salakayin ang lugar nito at makumpiska ang mga improvised explosive device sa Navotas City kamakalawa ng gabi.

Nahaharap sa kasong paglabag sa Presidential Decree 1866 (illegal possession and manufacturing of improvised explosive device) si Artemio Obeja,  ng #147 Interior Governor Pascual, Brgy. Sipac ng nabanggit na lungsod.

Nakumpiska sa pag-iingat nito  ang 37 bote na ginagamit sa dynamite fishing, 45 pirasong blasting caps, 1 sako  ng ammonium nitrate, 1 kawa na naglalaman din ng ammonium nitrate, 23 pirasong walang lamang bote at limang motor boats na ginagamit sa pangingisda.

Sa impormasyong nakalap ng pulisya, dakong alas-9:30 ng gabi nang madakip ang suspek sa isang bahay na mata­tagpuan sa kahabaan ng Pitong Gatang, Brgy. Sipac, Navotas City, Metro Manila. Si Obeja ay dinakip base sa bisa ng search warrant na inisyu  ni 2nd Vice-Executive Judge Mercedes Po­sada-Lacap ng Manila Regional Trial Court (RTC) Branch 15.

Ayon kay DIID deputy chief, C/Insp. Arturo Paras, una silang naka­­tanggap ng impormasyon hinggil sa paggawa at paggamit ng suspek ng dinamita sa pangingisda kaya’t agad silang nagsa­gawa ng surveillance at nang maging positibo ay kumuha sila ng search warrant na nagresulta sa pagkakadakip sa suspek. (Lordeth Bonilla)