Sugatan ang tatlong magkakapatid at live-in partner ng isa sa mga ito makaraang pagbabarilin umano sila ng grupo ng isang brgy. kagawad at anak nito sa Sta. Cruz, Maynila kamakalawa ng gabi.
Ginagamot ngayon sa Metropolitan Hospital ang magkakapatid na sina Melvin, 30; Marlon, 29 at Mervin Chan, 23 at live-in partner ng una na si Jennie Sena, 45, pawang residente ng 1337 Sulu St., Sta. Cruz, Manila sanhi ng tinamong tama ng bala sa katawan.
Arestado naman ang inginusong mga suspek na sina Oscar Barbosa, 48, barangay kagawad ng Brgy 318 Zone 32 Dist. 3; anak nitong si Orlando, 22; mga kamag-anak na si Manuel Barbosa, 40, tanod at Cesar Barbosa, 50, buko vendor, pawang residente ng 1336 Sulu St., Sta. Cruz.
Ayon sa ulat, dakong alas-11:15 ng gabi nang maganap ang pamamaril sa harapan ng bahay ng mga biktima.
Bago ang pamamaril, ay nagtungo umano sa tindahan sina Manuel at Cesar na umano’y napatingin sa grupo ng mga biktima na nakaupo sa harapan ng kanilang bahay.
Sinabihan umano ng isa sa grupo ng biktima kung bakit masamang makatingin ang dalawa subalit imbes na patulan ay umuwi ang dalawa at umano’y nagsumbong sa kagawad.
Lumabas umano ng bahay si kagawad, anak nito at ang dalawa at sinita ang grupo ng biktima na nauwi sa mainitang pagtatalo hangang sa maglabu-labo na ang mga ito.
Naglabas umano ng baril ang kagawad at pinaputukan ang mga biktima. Sumunod din umanong nagpaputok ng baril ang anak nito.
Nakuha sa insidente ang ilang basyo ng kalibre .45 at .38 na baril. sNaaresto ang mga suspek sa isinagawang follow up operations ng pulisya.
Nabatid na matagal ng may alitan ang dalawang panig makaraang magsampa ng kasong sexual abuse ang kampo ng mga biktima sa naturang kagawad. (Grace dela Cruz)