Niño Muhlach kinasuhan

Sinampahan ng kasong “reck­less imprudence re­sult­ing to damage to property with physical injuries” ng Que­zon City Traffic Management Unit ang dating child actor na si Niño Muhlach matapos na ma­bangga nito ang isang taxi nitong nakaraang Lunes ng umaga.

Isinampa ang kaso sa Que­­zon City Prosecutor’s Office laban kay Muhlach, Angelo Jose Rocha-Muhlach sa to­toong buhay, 36, at resi­dente ng #140 N. Domingo St., Cubao, ng na­turang lungsod.

Ito’y base sa reklamo ng bik­­timang si Ernesto Narciso, driver ng Jamonette taxi (TXJ-337) at naninirahan sa #2260 Avocado St., Camarin, Ca­loocan City.

Sa salaysay ni Narciso, na­ganap ang insidente dakong alas-3:15 ng madaling araw nitong nakaraang Lunes sa pa­­nulukan ng Panay at Dr. Garcia Avenue, ng naturang lungsod. Binabagtas ni Nar­ciso ang Panay Avenue nang bang­gain siya sa kanang tagi­liran ng kanyang taxi ng Mitsu­bishi Montero van (XTU-342) na mi­namaneho mismo ni Muhlach. Dahil sa lakas ng pag­kaka­bangga, nagpaikut-ikot ang taxi hanggang sa bu­mangga sa isang street sign. Bu­mangga naman ang van ni Muhlach sa bakod ng isang bahay sa tabi ng kalsada.

Isinugod naman si Narciso sa Capitol Medical Center ma­tapos na magtamo ng sugat sa kanyang katawan. De­pensa naman ni Muh­lach na galing sa isang kal­sada ang taxi na hindi muna nagme-menor o huminto kaya niya na­bangga ito. (Danilo Garcia)