Bultu-bultong mga bala, pampasabog ililipat na sa PNP

Nakatakdang ilipat ng Bu­reau of Fire Protection (BFP) sa kustodiya ng Philippine National Police (PNP) ang daang kahon ng mga bala at pampasabog na nakumpiska sa isang bodega na pag-aari ng isang Tsinoy sa Valen­zuela City.

Ito’y matapos na ipag-utos ni Department of Interior and Local Government (DILG) Secretary Ronaldo Puno upang hindi na magawang maitakas ang natu­rang mga bala sa loob ng bo­dega ng Stronghand Inc., sa Ser­vice Road, Brgy. Paso de Blas, Valenzuela City ng may-ari nito.

Inihahanda na rin ang pag­sasampa ng kasong illegal pos­session of ammunitions at explo­sives laban sa may-ari ng bodega na si Kedin Go Cedenio bukod pa sa kakaharapin dahil sa pag-ooperate ng walang business permit at lisensya sa Valenzuela City Government.

Nakatakda rin naman na big­yan ng spot promotion ni Puno ang mga bumbero na rumes­ponde sa lugar kung saan na­agapan na kumalat ang apoy na mahagip ang mga bala at pam­pasabog na posibleng lumikha ng napakalakas na pagsabog na maaaring ikasawi ng ma­raming buhay sa mga residente at mga motorista sa North Luzon Expressway.

Partikular na inatasan ni BFP director, Chief Supt. En­rique Linsangan na ibigay na ang mga dokumento at pisikal na mga ebidensya na nakalap sa lugar ng sunog sa PNP-Cri­mi­nal Investigation and De­tection Group (CIDG) na siyang nagsasagawa ngayon ng ma­susing imbestigasyon.

Matatandaan na naganap  ang sunog nitong alas-9 ng gabi ng Abril 5.  Dito nadiskubre ng mga bumbero ang 200 kahon ng iba’t ibang bala, 120 kahon ng slugs, smokeless powders at 1,600 kahon ng firearm primers. (Danilo Garcia)