Kolorum na mga jeep,  FX at tricycle, sinuyod  ng MMDA

Matapos na patikimin ng spray-painting ang mga out-of-line o mga kolorum  na bus ay mga jeepneys, taxicabs, vans at tricycle naman ang pi­nuntirya kahapon ng pinag­sanib na pwersa ng Metro­politan Manila Development Authority (MMDA) at pulisya na nakahambalang sa mga ilegal na terminal, side­walks, intersections at road right-of-ways sa EDSA.

Sa panayam kay MMDA Traffic Enforcement Group chief Roberto Esquivel, sinabi nito na dakong alas-6 ng umaga ka­hapon nang umpi­sa­han ng ahen­siya kasama ang ilang miyembro ng ka­pulisan ang panghuhuli sa ka­habaan ng Baclaran at Mo­numento ng Edsa Avenue.

Habang isinusulat ito ay patuloy pa ring isinasa­gawa ang nasabing operas­yon ng MMDA at kapulisan kung saan umaabot na sa ka­bu­uang 22 colorum bus, jeep, taxi at FX ang nasakote ng mga ito.

Ayon pa kay Esquivel na ang nasabing hakbang ay bilang pagpapatuloy sa ka­nilang Phase 2 campaign laban sa mga colorum na pampasa­he­rong sasakyan na walang pa­kundangang bumi­biyahe at nagpapasikip sa daloy ng trapiko sa Edsa.

Ayon pa kay Esquivel, ka­ra­mihan umano sa mga na­ares­tong jeep, taxi at FX ay pawang nakahambalang sa mga iligal nilang terminal sa mga inter­sections, sidewalk curbs, ilalim ng mga footbridge ng  MRT at LRT lines na nag­hi­hintay ng kani-kanilang mga pasahero.

Sa kaso naman umano ng mga naarestong colorum bus units, wala umanong kauku­lang micro-chips ang harapan ng mga windshields ng ka­nilang sa­sakyan at wala ring maipa­kitang kaukulang doku­mento ang mga driver na mag­papa­tunay na nasa tamang ruta nga sila.

Agad namang dinala ng MMDA sa kanilang im­pounding yards sa Pasig at Las Piñas  ang mga nahuling colorum na mga sasakyan.

Ang mga tsuper naman ng tricycle na naaresto ay binig­yan ng kaukulang multa at “warn­ing” kung saan kapag muling ma­aresto pa umano ang mga ito ay pa­patawan na sila ng mas ma­bagsik pa na pa­rusa. (Rose Tamayo-Tesoro)