300 pamilya nasunugan

Humigit-kumulang  sa 300 pamilya ang nawalan ng tirahan habang tinatayang aabot sa hala­gang limang mil­liong halaga ng mga ari-arian ang naabo sa isang sunog kamakalawa ng gabi sa Caloocan City .

Ayon kay C/Insp. Juan Reyes, Caloocan City Fire Mar­shal, dakong alas-7:20 ng gabi nang tupukin ng apoy ang bahay ng isang Eliza Abesamis sa #366 BMBA Compound, 2nd Street, 5th  Avenue ng nabanggi na lungsod.

Nagsimula ang sunog sa loob ng kuwartong inuukopa­han ng isang Junior at Levi Sebastian sanhi umano ng napabayaang sinindihang  kandila dahil sa walang kur­yente ng mga oras na iyon.

Ang sunog ay tumagal ng higit sa apat na oras at wala namang naiulat na nasaktan o nasawi sa nasabing insidente.

Samantala, naalarma at nabulabog ang mga res­i­dente ng isang barangay sa Valenzuela City nang biglang lamunin ng apoy ang isang bodegang naglalaman ng mga bala at  pampasabog  sa nasabing lungsod.

Sa nakalap na impormas­yon kay C/Insp. Agapito S. Nacario, Valenzuela City Fire Marshal, bandang alas-9 ng gabi nang magsimulang mag­­l­iyab ang kaliwang ba­hagi ng stockroom ng Stronghold Inc. na pag-aari ng isang Kedin Go Cedenio sa 559 Paso de Blas ng nabanggit na lungsod.

Dahil sa mabilis na pag­responde ng mga kagawad ng pamatay sunog ay dagling naagapan ang pagkalat ng apoy at mabuti na lamang ay hindi nadamay ang mga na­kaimbak na sari-saring bala ng iba’t ibang kalibre ng baril at mga pampasabog.

Nagsasagawa naman ng masusing imbestigasyon ang mga Arson Investigator hing­gil sa insidente at ele­mento ng Valenzuela City Police hinggil sa mga nadis­kubreng mga bala at mga pampasa­ bog para mabatid kung may kaukulang doku­­mento ang mga ito. (Lordeth Bonilla)