Mag-ama patay sa sunog

Patay ang isang   mag-ama matapos ma­kulong sa naglalagablab na apoy, habang tatlo pa ang sugatan sa dalawang magkahiwalay na sunog  na naganap kahapon ng umaga sa Pasay at Pa­rañaque City.

Magkayakap pa nang matagpuan ng mga ta­uhan ng Pasay City Bu­reau of Fire Protection  ang mag-amang biktima na sina Rufo, 38; at Ro­de­lyn Upos, 9, sa tinitira­han nilang apartment  na matatagpuan sa #202 Orion St., Libertad, Pasay City.

Batay sa pagsisiyasat ni Arson investigator SFO3 Renato Recto, nag­­­simula ang sunog da­kong alas-4:55 ng ma­daling-araw sa apartment na tinutuluyan ng mag-ama  na hinihinalang nag­simula dahil sa sala-salabat na koneksiyon ng kuryente.

Ilang mga nasunugan ding residente ang nag­pa­hayag na narinig pa nila ang paghingi ng tulong ng mag-ama ma­tapos ma­ kulong sa nasu­sunog na apartment su­balit wala nang magawa ang mga kapitbahay dahil lubha ng malaki ang apoy.

Dakong alas-6:35 na ng umaga nang matag­puan ng mga bumbero ang bangkay ng mag-ama matapos na tulu­yang maapula ang apoy na tumupok sa tinatayang P2-milyong halaga ng mga ari-arian.

Samantala, sa hiwa­lay na insidente, sugatan naman at isinugod sa pa­gamutan ang apat na ka­tao sa malaking sunog na tumupok sa may 100 ka­bahayan dakong alas-6:45 ng umaga sa Cruz Compound, Brgy. San Isidro, Parañaque City na hinihinalang sanhi ng na­iwanang nakasinding kandila.

Kinilala ang mga su­gatan na sina Josel dela Rosa; Ricardo Ramos; Gabriela Resultay at Jenny Buco na pawang nasa ligtas nang kala­gayan.

 Hinahanap naman ng mga awtoridad ang may-ari ng bahay na pinag­mu­lan ng sunog na nakila­lang si Vanny Sagala, 25,  na bigla na lamang nag­laho matapos maapula ang apoy dakong alas-9:10 ng umaga.

Aabot naman sa ma­higit P5 milyong halaga ng ari-arian ang naabo sa naturang sunog na naka­apekto sa may 200 pa­milya.