Tarpaulin ni BF babaklasin

Babaklasin umano ang lahat ng mga dambuhalang larawan ni Metropolitan Manila Develop­ment Authority (MMDA) Chair­man Bayani F. Fernando na naka­lagay sa lansangan na sakop ng Makati City.

Sinabi ni Makati City Mayor Jejomar Binay, tinawagan na niya ng pansin ang naturang ahen­siya at pinakiusapan na baklasin na ang mga naglalaki­hang larawan ni Fernando dahil una na umanong sinabi ng MMDA na bawal ang maglagay ng mga tarpaulin at katunayan ay pinagbabaklas noon ng MMDA ang mga nakakabit na tarpaulin sa Edsa.

Ayon pa sa alkalde, paba­bayaan muna nilang ang MMDA mismo ang magtanggal ng mga poster ni Fernando na naka­lagay sa lansangan na sakop ng Makati, subalit kapag hindi binig­yang-pansin ng ahen­siya ang kanilang panawa­gan, mapipili­tan siya na ipabaklas ito sa kan­yang mga tauhan.

Iginiit pa ni Binay na hindi na siya nagtataka ngayon kung bakit gigil na gigil si Fernando na baklasin ang mga poster, tar­paulin at iba pang malalaking advertisement sa kahabaan ng EDSA dahil layunin pala ng buti­hing chairman na larawan lamang niya ang ibandera rito.

Naniniwala din ang alkalde na dapat ipaliwanag ni Fer­nando kung saan nanggaling ang pondong ginamit sa pagpa­pa-imprenta ng naglalakihang poster ni Fernando na ngayon ay nagkalat sa Metro Manila.

Sa panig naman ng MMDA, sinabi ni Gen. Manager Ro­bert Nacianceno na handa silang humarap sa anumang uri ng im­bestigasyon kaugnay sa pon­dong pinanggalingan dahil ma­linaw naman na bahagi ito ng isi­ nusulong na programang Metro Guwapo ng kanilang ahensiya.

Dagdag pa ni Nacianceno na walang halong pulitika ang pag­lalagay sa larawan ni Fer­nando sa naturang anunsiyo dahil siya naman ang talagang pasimuno ng magagandang proyekto at kaayusan sa Metro­polis na hang­gang ngayon ay patuloy na isinasagawa ng kanilang ahensiya. (Rose Tamayo-Tesoro)