Kaso vs anak ni Mayor Lim, pinasusulong ng DOJ

Pinasusulong na ng De­partment of Justice (DOJ) ang pagsasampa ng kasong droga sa Korte laban sa anak ni Manila Mayor Alfredo Lim.

Base sa limang pahi­nang resolution ni State Pro­secutor Nolibien Quiam­bao, pinasasampa na nito sa Manila Regional Trial Court (RTC) ang ka­song paglabag sa Sec.5 at 15 ng Art II ng  RA 9165 o ang pagtutulak ng ipinag­babawal na gamot laban kay Manuel Lim, Joel Sabado at Ronald Pascua.

Sinabi ni Quiambao, may sapat na basehan upang isulong ang na­sabing kaso sa hukuman at wala itong makitang ka­malian sa isinagawang buy-bust operation ng Philippine Drug Enforce­ment Agency (PDEA).

Ang grupo ni Lim ay naaresto sa isinagawang buy-bust operation ng PDEA noong March 15, 2008 ng madaling-araw sa Binondo Maynila habang nagbebenta ng droga sa isa sa mga miyembro ng PDEA na umaabot sa 100 gramo ng shabu na may halagang P340 libong piso.

Binalewala naman ng prosekusyon ang naunang inihaing petisyon ng abo­gado ni Lim na si Atty. Mario Ongkiko na ibaba sa kasong drug user ang ka­song drug pushing  ng anak ng Alkalde. (Gemma Amargo-Garcia)