Bunsod ng matinding galit sa mga rapist, nilaslasan ng leeg ng isang preso ang kapwa preso na may kinakaharap na kasong rape kahapon ng hapon sa loob ng kulungan sa Binondo, Maynila.
Patay nang idating sa Jose Reyes Memorial Medical Center ang biktimang si Ernesto Diocton, 41, may-asawa, at residente ng Blk. 3, Area 9, Port Area Manila matapos na laslasan sa leeg ng kapwa niya bilanggo na si Noel Sanchez, 26, binata, at residente ng Gate 62 Area H, Parola Compound, Binondo, Maynila na may kasong frustrated murder.
Batay sa imbestigasyon ni PO2 Dennis Javier ng Manila Police District-Homicide division, ang insidente ay naganap dakong alas-12:30 ng tanghali sa loob ng kulungan ng MPD-Station 11 (Binondo).
Nilaslas ng suspek ang leeg ng biktima sa pamamagitan ng pinatulis na plastic bottle ng C2.
Ayon sa pulisya, malaki umano ang galit ng suspek sa biktima nang malaman nitong rape ang kaso ng huli dahil sa naging biktima na rin umano ng rape ang live-in partner nito.
Inamin naman ng suspek na nagdilim umano ang kanyang paningin nang madiskubreng rapist umano ang kanyang kasama sa detention cell kung kaya’t hindi niya napigilan ang sarili kaya nilaslas niya ang leeg nito.