Metro Mayors na tutol sa single ticketing pakiusapan na lang – DILG

Pinayuhan kahapon ng Department of Interior and Local Government (DILG) ang mga transport groups na makiusap na lamang sa apat na Metro Mayors na tu­mututol sa implemen­tasyon ng single ticketing system.

Ipinaliwanag ni Under­sec­retary for Public Safety Atty. Marius Corpus na hindi maaaring saklawan ng Executive Order 712 ni Pangulong Arroyo ang aw­tonomiya ng mga alkalde. 

“Ang silbi lang niyang executive order na iyan ay para sa national policy para sa single ticketing system, kapag hindi sumu­nod ang mga mayor ay sa korte na ba­bagsak iyang isyu na iyan,” ayon kay Corpus. 

Idinagdag pa nito na hindi naman talaga kaila­ngan ng executive order, mag­bi­bigay lang umano ito ng “false hopes” sa mga trans­port groups.

Sinabi rin nito na ang posisyon ng DILG ay hindi naman kailangan ang Mala­cañang ang mag-isyu ng executiver order na ma­aari namang gawin na ng Department of Transpor­tation and Communica­tions (DOTC) habang may mga probisyon rin ang local government code at ang Metro­politan Manila De­ve­lopment Authority charter para magpalabas nito.

Nakatakda namang ma­­kipag-usap ang DILG sa pangunguna ni Under­sec­retary for Local Govern­ment Austere Panadero sa mga Metro Mayors parti­kular na ang mga kumo­kon­trang sina Makati Mayor Jejomar Binay, Navotas Mayor Toby Tiangco­, San Juan Mayor Jo­seph Victor Ejercito at Pasay City Mayor Pewee Trinidad upang ma­pa­kiusa­pan na gumawa ng solus­yon sa krisis.

Kung magkakaprob­lema naman umano sa la­bis na paniningil ng mga ku­­mokontrang Metro Mayor, bahala na umano ang mga transport groups na mag­sampa ng kaso sa korte upang siyang rume­solba dito. (Danilo Garcia)