Trader kritikal sa 2 hired killer

Isang 34-anyos na negos­yante ang malubhang nasuga­tan matapos itong barilin ng dalawang hindi kilalang kalala­kihan na pinaniniwalaang mga “hired killer” kahapon ng ma­daling-araw sa Malabon City.

Ginagamot sa Manila Cen­tral University (MCU) Hospital ang biktimang si Noel Tibora, isang scrap buyer, taga Jose St., Concepcion, Niugan, ng na­banggit na lungsod, nagtamo ito ng tama ng bala sa katawan.

Mabilis na tumakas ang hindi pa nakikilalang mga sus­pek sakay ng isang motorsiklo.

Sa imbestigasyon ng Mala­bon City Police, naganap ang in­sidente dakong alas-2:30 ng ma­daling-araw sa kahabaan ng Damson St., Brgy. Dampalit ng lungsod na ito habang minama­neho ng biktima ang kanyang owner-type jeep nang bigla na lamang tapatan ng motorsiklo ng mga suspek.

Walang sabi-sabing binaril ng mga suspek ang biktima. Kahit nagtatakbo ang biktima para iligtas ang sarili, hinabol pa rin ito ng mga suspek at muling pinaputukan. Nang maglabasan ang mga residente dahil sa na­rinig na sunud-sunod na putok ng baril, dali-daling nagsitakas ang mga suspek.

Sa teyorya ng pulisya po­sib­leng mga hired killer ang mga sus­pek at maaaring may kinala­man sa negosyo ng biktima na isang scrap buyer ang tangkang pagpatay dito. Sa ngayon ay pa­tuloy na iniimbestigahan ang nasabing kaso. (Lordeth Bonilla)