Isang hindi pa nakikilalang lalaki ang iniulat na nagbigti sa itaas ng malaking billboard kahapon ng umaga sa Mandaluyong City.
Gayunman, masusi pang inaalam ng puilsya kung binigti o kusang nagbigti ang biktima na tinatayang nasa edad 50-hanggang 55-anyos, nakasuot na maroon t-shirt at short pants.
Ayon kay SPO4 Jaime Masilang ng Mandaluyong PNP, dakong alas-9 ng umaga nang makatanggap sila ng tawag mula sa isang concerned citizen at ipinaalam sa kanila ang pagkakatagpo sa biktima nakabigti sa itaas ng malaking billboard ng isang kilalang dermatologist sa kahabaan ng Brgy. Barangka Ilaya ng lungsod na ito.
Agad namang rumesponde ang pulisya sa nasabing lugar kasama ang Scene of the Crime Operatives ng Eastern Police District (SOCO-EPD) at tumambad sa kanila ang biktima sa itaas ng billboard na nakabigti ng nylon cord sa leeg at nakapulupot sa bakal nito.
Sa pagsisiyasat ni Masilang, nabatid kay Rogelio Magdasal, security guard ng katabing gusali ng pinangyarihan ng insidente na napansin na umano niya ang biktima ng madaling-araw pa lang ay palakad-lakad at tila balisa ang kilos ng naturang lalaki subalit ipinagwalang bahala niya ito.
Ilang oras ang nakalipas dagdag pa ng sekyu ay laking gulat na lamang nito nang magkagulo ang mga dumadaang tao sa lugar dahil sa pagkakatuklas ng bangkay ng biktima na nakabigti na sa itaas ng billboard.
Kasalukuyang dinala ang bangkay ng biktima sa PNP Crime laboratory upang sumailalim sa awtopsiya para malaman kung may foul play na naganap sa nasabing insidente.
Samantala, isang 22-anyos na babae ang iniulat na nagbigti rin kahapon ng umaga sa Pasay City.
Wala nang buhay nang matagpuan dakong alas- 9 ng umaga na nakabitin sa kisame ng bahay ang biktimang si Rowena Develos, ng #68 Apollo 12, San Gregorio Village ng nabanggit na lungsod.
Lumalabas naman sa isinagawang pagsisiyasat ng scene of the crime investigators, na may malaking kaugnayan ang pagpapatiwakal ng biktima sa namumuong sigalot at pag-kontra ng kanyang pa milya sa pakikipagrelasyon nito sa kinakasama na kinilalang si Alvin Adeva. (Dagdag ulat ni Rose Tamayo-Tesoro)