4 pulis-QC sabit sa hulidap

Apat na tauhan ng Quezon City Police District (QCPD) ang inireklamo ng hulidap ng tatlong negos­yante makaraang tangayin umano ang P345,000 na puhunan nila sa negosyo sa cellphone.

Dumulog kahapon sa QCPD-Criminal Investi­gation and Detection Unit ang mga biktimang sina Melvin Cruz, 27; Jammel Romuros, 26; at Cecille Garrido, 32, pawang mga residente ng #163 M.H. del Pilar street, Malabon City.

Nakatakdang magsa­gawa ng police line-up sa kanyang mga tauhan si QCPD-District Mobile Force chief, Supt. Chris­to­pher Jacob Mateo upang po­­­sitibong kilalanin ng tat­long biktima ang apat na pulis.

Sa salaysay ng mga bik­tima, dakong alas-4 ng ma­­daling-araw noong Marso 13 sa panulukan ng EDSA at Balintawak ay na­ka­sakay sila ng taxi pa­tungo ng Bac­laran upang mamili uma­no ng cell­phone at ac­cessories nang parahin ng dalawang mo­bile car sakay ang apat na pulis.

Pinababa umano sila, ki­­napkapan at binuksan ma­­ging ang bag ni Garrido na naglala­man ng P345,000 na puhu­nan nila ngunit iginiit ng mga suspek na “drug money”.

Isinakay pa sila umano ng mga pulis sa mobile car at inikut-ikot kasabay ng pa­na­nakot na dadalhin sa pre­sinto. Ibinaba sila sa kanto ng D. Tuazon at Del Monte Ave. at pinasibad ang mo­bile car dala ang pera nila.

Sa apat na pulis, isa la­mang ang nakilala nila sa pa­mamagitan ng name­plate nito sa apelyidong “Bacani”.

Kinumpirma naman ni Col. Mateo na may tauhan siyang Bacani na naka­tak­da ngayon nitong ipata­wag upang kilalanin ng mga bik­tima at masampa­han ng kaso kabilang ang tatlo pang kasama. (Danilo Garcia)