AWOL na pulis nagwala sa casino, arestado

Kulungan ang binagsakan ng isang AWOL na pulis mata­pos na magwala sa loob ng isang casino kamakalawa ng gabi sa Quezon City.

Nasa kustodiya ngayon ng Quezon City Police District-Sta­tion 9 (Anonas) ang suspek na si PO3 Ariel Binluan, 32, naka­talaga sa Police Regional Office IV-A (Calabarzon), ng #7-D 2nd West Crame, San Juan City.

Inireklamo ito ni April Coba­rubias, 25, guest assistant ng Casino Filipino On-Line Gaming Ca­sino, nasa panulukan ng EDSA at Kamias St., ng na­tu­rang lungsod matapos na pag­bantaan na sasaktan. Sa sum­bong ni Co­barubias, sinabi nito na pumasok sa ka­nilang establi­simiyento dakong alas-7:30 ng gabi ang suspek at nagpaki­lalang pulis. Naglaro umano ito ngunit natalo kung kaya nang­hiram umano ito ng pera, natural na hindi niya pinag­bigyan.

Dito umano nagalit ang pulis at tinakot na sasaktan siya kapag hindi pinayagan na ma­kapaglaro nang walang pera.  Nagkaroon ng komosyon dahil sa pagwa­wala ng suspek kung saan ma­ging ang ibang mga man­­lalaro ay tinangka nitong hi­ra­man ng pera. Agad na nag­suplong sa pu­lisya ang mga tauhan ng online gaming sanhi upang arestuhin si Binluan. Sa istasyon, sinabi ni Bin­luan na na­gawa lamang niya iyon upang magkapera para pam­bili ng gamot sa anak na may­­sakit, gayunman desi­dido ang may-ari ng online gaming na sampahan ng kaso ang suspek. (Danilo Garcia)