Motorsiklo vs jeep: 2 todas, 1 sugatan

Dalawa katao ang nasawi at malub­hang nasuga­tan ang isa pa matapos sumal­pok ang isang motor­siklo sa isang pampasaherong jeep kahapon ng madaling-araw sa Valenzuela City.

Namatay sa mismong lugar ng pi­nang­yarihan ng insi­dente ang bikti­mang si Rey Leonardo, 37, messenger ng  66 Daungan St., Malhakan, Meycauayan, Bulacan dahil sa tinamong grabeng pinsala sa katawan.

Hindi naman umabot ng buhay sa Na­tional Ortho­pedic Center ang bikti­mang si Baby Cerias, 32, ng Villa Socorro, Marilao, Bulacan, habang si Vilma Datol, 34, nakatira sa #53 Soriente St., Tugatog, Mey­caua­yan, Bulacan ay patuloy pa ring inoobserbahan sa natu­rang pagamutan.

Kasalukuyan namang nakapiit sa Valenzuela City Traffic Eneforcement Unit (VCTEU) at nahaharap sa kauku­lang kaso ang driver ng jeep na si Jacinto Buan, 65, ng  436 Dulong Tangke, Brgy. Malinta ng nabanggit na lungsod.

Nabatid na dakong alas-12:30 ng madaling-araw nang maganap ang insidente sa panulukan ng Mc Arthur High­way at M.H. del Pilar St., Brgy. Malanday, Valenzuela City.

Sa nakalap na impormasyon,  binabagtas ng jeep na may plakang TVL-603 (may rutang Malanday-Divi­soria) na minamaneho ni Buan ang ka­habaan ng Mc Arthur Highway, nang bigla na lamang sumalpok sa harapan ng sasakyan nito ang isang Honda Wave na motorsiklo na may license plate number na CE-7739 na minama­neho naman ni Leonardo habang naka­angkas naman ang dalawa pang biktima.

Dahil sa lakas ng pagkakasalpok ay tumilapon ang tatlong biktima sa magka­kahiwalay na direksiyon kung saan ay agad na namatay si Leonardo, saman­talang sina Datol at Cerias ay agad na naisugod sa nabanggit na pagamutan ngunit hindi na rin umabot ng buhay ang huli. (Lordeth Bonilla)