Holdaper timbog sa marshall

Natimbog  ng isang pulis ang isang 37-anyos na holda­per habang ito ay nambibik­tima ng mga estudyante sa loob ng pampasaherong jeep­ney kama­kalawa ng gabi sa Sta. Cruz, Maynila.

Nahaharap sa kasong robbery hold-up ang suspect na nakilalang si Joel Trinidad Rodriguez, may-asawa, wa­lang trabaho, tubong Nueva Ecija, ng 637 Carlos Palanca St., Quiapo, Maynila dahil sa reklamo ng bik­timang si Jonathan Fer­nando, 17, bi­nata, dancer, ng 3375 A.C. Herrera St., Tondo, Maynila.

Ayon sa ulat, dakong alas-7 ng gabi nang maganap ang naturang panghoholdap ng suspect sa loob ng jeep ha­bang sila ay nasa panulu­kan ng C.M. Recto Avenue at J.P. Rizal Avenue, Sta. Cruz, Maynila. Sa imbestigasyon ng pu­­lisya, papunta umano ang gru­po ng biktima sa Pasig, Orti­gas para ka­usapin ang ka­nilang promoter nang holdapin sila ng suspect sa loob ng jeep na kanilang sina­sakyan sa na­batid na lugar na pinang­yarihan.

Lingid sa kaalaman ng sus­pek ay nakasakay din sa natu­rang jeepney si PO2 Arturo Coro­nel ng Pandacan Police Station 10 na nagsisilbi uma­nong marshall sa mga pumapa­sadang sasakyan sa Metro Manila.

Habang tinututukan ng pa­talim ng suspect ang mga bik­tima at tinatangay ang mga gamit nito ay agad na umak­syon si PO2 Coronel at nagpa­kilalang pulis kaya’t agad na naaresto ang suspect.

Narekober sa pag-iingat ng suspek ang Nokia cellphone ng biktima at isang balisong na ginamit nito sa panghoholdap. (Grace dela Cruz)