Tricycle driver tinarakan ng kapwa driver

Kritikal ang isang 47-anyos na tricyle driver nang patraydor itong  pag­­sasaksakin ng ice pick ng kapwa nito tsuper, habang ang una ay nag­hihintay ng pasahero, ka­makalawa ng gabi sa Caloocan City.

Kasalukuyang ino­obserbahan sa Manila Central University (MCU) Hospital sanhi ng tinamo nitong mga tama ng saksak sa iba’t ibang parte ng katawan ang bik­timang si Larry Bonifacio ng 22 Panday Pira St., Brgy. 146, Bagong Barrio ng nabanggit na lungsod.

Isang manhunt opera­tion naman ang kasalu­kuyang isinasagawa ng mga elemento ng Calo­ocan-PNP laban sa sus­pect na si Jocel De Juan, alyas Boy Hulog, nasa hustong gulang, tricycle driver at residente ng 37 Binata St., Brgy. 144, Ba­gong Barrio, Caloocan City.

Batay sa ulat,  dakong alas-9:45 ng gabi nang mangyari ang nasabing insidente habang ang bik­tima ay  nag-aabang ng pasahero sa panulu­kan ng Tirona St., at Epi­fanio delos Santos Ave­nue (EDSA), Caloocan City.

Nabatid na biglang sumulpot ang suspect sa likurang bahagi ng bik­tima at walang sabi-sabing pinag-uundayan ito ng saksak ng ice pick hanggang sa duguang humandusay sa lupa.

Sa pag-aakalang na­patay ni De Juan si Boni­facio ay mabilis na tuma­kas ang suspect dala ang ginamit na armas, ha­bang ang biktima ay aga­rang isinugod ng ilang ka­samahan nitong tricycle driver sa nabanggit na ospital kung saan nasa ma­selan ngayon itong kalagayan.

Napag-alaman na ilang araw bago maga­nap ang insidente, ang bik­­tima at suspect ay nag­karoon ng mainitang pag­tatalo na humantong sa pagsusuntukan dahil umano sa pag-aaga­wan ng mga ito ng pasahero kung saan ang suspect ay labis na na-de­hado at posible uma­nong ginan­ti­han nito ang una sa  pamamagitan ng pana­ naksak kamaka­lawa. (Rose Tamayo Tesoro)