P328-M para sa road widening ng MMDA

Plano ng Metropolitan Manila Develop­ment Authority (MMDA) na mag-road widening sa Andrews Avenue  na posibleng makumpleto  sa loob ng apat na buwan ng 2008.

Sa isinagawang pag-aaral ng naturang ahensiya, anim na linya ang balak gawing pagpapalapad ng kalsada dahil sa napi­pintong dodoble ang dami ng sasakyan sa 2015 lalo na kapag naging operational na ang NAIA 3 terminal.

Nabatid na binuksan ng MMDA ang pinakabago nitong proyekto sa lansangan upang mapaluwag ang trapiko sa Andrews Avenue malapit sa NAIA 3 terminal sa Pasay City .

“Naresolba na rin ang pagsisikip ng trapiko sa Manlunas at Sales Streets patungo sa Andrews Avenue at NAIA 3 terminal na noon ay naging parking area ang  kahabaan ng kalsada dahil sa ma­bagal na usad ng mga sasakyan,” pahayag ni MMDA Chairman Bayani F. Fernando,

Sa proyektong road widening na tatagal sa loob ng 12 hanggang 18 buwan, tina­tayang aabot ng P48 milyon ang ga­gastusin at sa konstruksiyon naman ng flyover at widening ng Andrews Avenue ay posibleng gumastos ng P280 milyon.

Napag-alaman na nagbigay ng donas­yon ang  management ng NAIA 3 na 15-metro ng kanilang property line sa MMDA para sa karagdagang lane-component ng rotonda. (Rose Tamayo-Tesoro)