Bunsod umano ng kagipitan sa pag-aaral, mas pinili na lamang ng isang 2nd year-nursing student na magpatiwakal sa pamamagitan ng pagbibigti kamakalawa ng gabi sa Sampaloc, Maynila.
Hinihinalang may ilang oras nang patay nang madiskubre ang bangkay ni Grace Ann Luces, 18, 2nd year Nursing student ng De Ocampo Memorial College ng 456 Maganda St., Sampaloc, Manila.
Batay sa isinagawang imbestigasyon MPD-Homicide section, dakong alas-7 ng gabi nang madiskubre ang biktima na nakabitin sa isang hanging cabinet sa loob ng maid’s quarter sa 2nd floor sa 456 Maganda St., Sampaloc, Manila.
Ang biktima ay huling nakitang buhay kamakalawa ng gabi ni Wilma Caple, 31, katulong, nang iwan nitong natutulog sa 2nd floor ng maid’s quarter ng condominium unit.
Pagbalik ni Caple sa condominium ay hindi ito makapasok dahil nakasarado ang main gate nito hanggang sa dumating si Rico Romar, isa sa mga occupant sa 3rd floor ng condo unit. Pagdaan ng mga ito sa maid’s quarter ay nakita ang biktima na nakabitin ang leeg sa isang hanging cabinet.
Sa kabila umano na matataas ang grado ng biktima, posible umanong ang hindi makapagpapatuloy ng biktima sa kanyang pag-aaral sa susunod na semester dahil sa kakapusan sa pera ang posibleng motibo sa isinagawa nitong pagpapakamatay.
Nabatid na umuwi ang biktima sa kanilang probinsiya sa Albay kung saan kinumpirma ng kanyang magulang ang kawalan nila ng kakayahang matustusan ang kanyang pag-aaral. Ang tiyahin ng biktima ang nagpapaaral sa kanya at doon din tumutuloy sa kanilang condominium unit.
Gayunman, patuloy na iniimbestigahan ng pulisya kung may naganap na foul play sa pagkamatay nito. (Grace dela Cruz)