Sugatan ang dalawang empleyado ng isang money changer matapos pagbabarilin ng anim na armadong holdaper na humarang at tumangay sa dala-dala nilang pera kamakalawa sa Ermita Maynila.
Kasalukuyang nilalapatan ng lunas sa Manila Doctor’s Hospital ang mga biktimang sina Gulam Hamja, 52, at Murphy Acidin, 24, kapwa empleyado ng King F Money Changer na matatagpuan sa 1166 A. Mabini St., Ermita sanhi ng tama ng bala sa katawan.
Patuloy namang tinutugis ng mga awtoridad ang anim na suspek na pawang nakasakay sa tatlong motorsiklo, isang kulay blue na XRM; isang kulay pula at itim na Kawasaki XR at isang Honda Super 4 Series, na pawang walang plate number.
Ayon sa report , dakong 5:25 ng hapon nang naganap ang panghoholdap sa kanto ng A. Mabini at A. Flores Sts., sa Ermita.
Ayon sa salaysay ni Yasser Surain, galing sa pagwi-withdraw ang mga biktima sa Banco De Oro sa U.N. Ave. branch at habang naglalakad pabalik sa kanilang tanggapan nang harangin sila ng mga suspek.
Pilit umanong kinukuha ng mga suspek ang hawak na bag ng mga biktima subalit tumanggi ang mga ito dahilan upang barilin sila saka tinangay ang bag na naglalaman ng di pa mabatid na halaga ng cash. (Gemma Amargo Garcia)