Dahilan sa kagustuhang may maibiling paputok para sa pagsalubong ng Bagong Taon, pinasok ng isang 27 anyos na lalake ang isang computer shop at hinoldap ang isang kustomer nito ngunit minalas na maaresto ng mga awtoridad sa lungsod ng Malabon kamakalawa.
Kaya naman sa kulungan na magdiriwang ng Bagong Taon ang suspek na si Richard Orteza, walang trabaho, pansamantalang nanunuluyan sa loob ng isang public cemetery sa lungsod.
Nabawi rin sa suspek ang isang Nokia 6103 cell phone na kinuha nito sa biktimang si Leo Pinson, 24, binata ng Villa Ralba St., Tinejeros sa lungsod.
Ayon kay PO2 Rommel Habig, imbestigador ng Station Investigation Unit ng Malabon Police, nangyari ang insidente dakong alas-9:50 ng gabi sa may i-scroll computer shop sa M.H. del Pilar, Tinejeros.
Naglalaro ng games sa computer ang biktima nang biglang pumasok ang suspek at nilapitan ang una, sabay deklara ng holdup gamit ang kutsilyo. (Ricky Tulipat)