Umaabot sa 98 kriminal na sangkot sa iba’t-ibang uri ng street crime ang nasakote ng mga operatiba ng National Capital Region Police Office (NCRPO) sa loob ng isang linggong operasyon sa Metro Manila.
Sa ginanap na Talakayan sa Isyung Pampulis (TSIP) sa Camp Crame kahapon, iniharap ni NCRPO Chief Director Geary Barias sa mediamen ang mga nasakoteng suspect.
Ayon kay Barias ang 98 nasakoteng kriminal ay bunsod ng pinalakas na street crime prevention ng limang Police Districts sa Metro Manila partikular na ngayong nalalapit na ang kapaskuhan.
Kabilang sa mga nasakote ay mga notoryus na kriminal na sangkot sa street level drug pushing, robbery/holdup, snatching, theft, estafa/swindling at iba pang uri ng street crimes.
Sinabi ni Barias na ang mga suspect ay nasakote alinsunod sa pinaigting na Night Watch patrol system at ang “Oplan Mamang Pulis at Mamamayan, Bayanihan Para sa Mapayapang Kapaskuhan operations.”
Inihayag pa ng opisyal na partikular na mahigpit na binabantayan ay ang mga lugar na natukoy na hotspot sa Metro Manila at ang mga flea market kung saan madalas magsamantala ang mga kriminal.
Kabilang naman sa natukoy na crime prone areas ay ang Bagong Silang sa Caloocan City, Commonwealth, Edsa at Aurora Boulevard sa Quezon City; CM Recto at Taft Avenue sa lungsod ng Maynila at maraming iba pa .
Sa mga flea market na madalas pangyarihan partikular na ang pandurukot, bag slashing at snatching ay ang Quiapo, Baclaran, Parañaque City at Divisoria. (Joy Cantos)