Metro Manila binaha sa “cold front”

Binaha ang ilang ba­hagi ng Metro Manila na nagdulot ng pagkaka-stranded ng libu-libong mga estudyante at mga commuters matapos ang malalakas na pag-ulan sanhi ng “cold front”  ka­hapon ng umaga.

Sa report na nakalap kahapon ng tanggapan ni National Disaster Coordi­nating Council (NDCC) Executive Director Glenn Rabonza, naitala ang hanggang gulong na mga pagbaha sa mababang lugar sa Quezon City, May­nila at maging sa Pasay City.

Dakong alas-8:45 ng umaga ay na-monitor ang hanggang gulong na mga pagbaha sa kahabaan ng E. Rodriguez Boulevard, Araneta Avenue sa Que­zon City; Quezon Avenue malapit sa Plaza Miranda sa  Quiapo, Maynila.

Binaha rin ang south­bound portion ng Efipanio delos Santos Avenue (EDSA) at Zamora St. sa Pasay City malapit naman sa Metropoint mall.

Samantalang maging ang bahagi ng Magalla­nes sa pinansiyal na dis­trito ng Makati City ay na-monitor rin.

Kabilang pa sa mga apektado ay ang ilang mga bahagi sa lung­sod ng Maynila tulad ng ka­ha­baan ng Dimasalang, España, Maceda, C.M. Recto Ave­nue, at iba pang parte ng Quiapo at  Divi­soria. Ang insidente ay nagdulot ng pagkaka-stranded ng libu-libong mga estudyante at mga commuters na halos wa­lang masakyan at basang-basa sa malakas na pag-ulan.

Ayon sa PAGASA  ang malalakas na pag-ulan na nararanasan sa Central at Southern Luzon, par­ tikular na sa Metro Manila ay hindi sanhi ng nagba­bad­yang bagyo kundi ng isang “cold front”. (Joy Cantos)