NCRPO itinangging idinidiin ang Ayala Corp. sa Glorietta blast

Itinanggi kahapon ni National Capital Region Police Office (NCRPO) chief, Director Geary Barias ang mga speku­las­yon na idinidiin na nila ang Ayala Land Inc.  sa naganap na pagsa­bog sa Glorietta mall 2 noong Biyernes ng Oktubre 19.

Sinabi ni Barias, na wala naman silang ra­son para idiin ang Ayala sa kabila na sinasabing aksidenteng “gas explo­sion” ang naganap.  Idiniin nito na sa umpisa pa lang ay tumutulong na sa kanila ang Ayala at patuloy pa rin naman ang kanilang pakikipag-usap dito.

Inamin naman nito na hindi pa nila naku­kuha ang submersible pumps sa lugar ng pag­sabog na pangunahing pagkukunan ng imbes­tigasyon ng pulisya.  Ilan namang  mga mahaha­lagang gamit ang nare­kober at isinasailalim pa sa pagsusuri.

Itinanggi rin nitong magbigay ng pahayag ukol sa sinasabing elec­trical malfunction ang sanhi ng pagsabog dahil isinasailalim pa sa pag­susuri ang lahat ng bagay na kanilang nare­kober sa lugar kabilang na ang electrical fuse sa motor pump at isang jum­per wire  na posib­leng lumikha ng kislap na sanhi ng pagsabog.

Nakatakdang ipala­bas naman ng multi-agency investigation task force sa pamu­muno ni Southern Po­ lice District Director C/Supt. Luizo Ticman, ang pinal na resulta ng ka­ nilang imbestigasyon sa loob ng isa hang­gang dala­wang  linggo. (Da­nilo Gar­cia at Rose Tamayo-Tesoro)