Sa kabila ng deklarasyon na special holiday ngayong araw ng synchronized Sangguniang Kabataan (SK) at Barangay elections, nagpakalat ang Department of Justice (DOJ) ng mga prosecutors sa Metro Manila.
Kinumpirma kahapon ni Chief State Prosecutor Jovencito Zuño na may mahigit 100 inquest prosecutors ang itinalaga sa iba’t ibang barangay na hahawak sakaling magkaroon ng election related offenses sa panahong nagaganap ang botohan.
“I have ordered the National Capital Region Chief Prosecutors to double the number of their inquest prosecutor due to possibility of election related crimes,” ayon kay Zuño.
Kabilang sa posibleng magkaroon ng paglabag sa vote-buying, liquior ban, gun ban, physical injuries, assaults at iba pang karahasan na normal na nangyayari sa mga panahon ng eleksiyon.
Noong nakalipas na linggo, inabisuhan na rin niya ang mga Regional State Prosecutors sa bansa na ilagay sa alert status ang mga lokal na piskalya upang makatiyak na may hahawak sa anumang kaso na maaring isailalim sa inquest proceedings.
Ang pagsasailalim sa inquest ng mga nahuhuling suspek ay kailangan upang maagapan ang kaso at hindi lumagpas sa prescribed period na itinatadhana ng batas. (Ludy Bermudo)