Pabuya vs killer ng bata sa basurahan

Handang magbigay ng pabuya ang mga resi­dente sa sinumang may impormasyon kaugnay sa pagpatay sa isang paslit na natagpuan sa ba­sura­han noong Huwebes ng umaga sa Tondo, Maynila. 

Sinabi ni Det. Jonathan Bautista, ng Manila Police Dis­trict (MPD)-homicide section, nagkaisa ang ilang residente ng Brgy. 118 Zone 16 District 1 na magkaloob ng P5,000 pabuya sa sinumang makaka­pagtuturo sa salarin na pu­matay sa hindi pa nakikilalang paslit na na­tag­puang tadtad ng saksak dakong 6:10 ng umaga sa kumpol ng basura­han sa harapan ng isang bahay sa 541 Road 2 Manotoc subd., Gagalangin, Tondo.

Sinabi pa ni Bautista na bagama’t maliit ang halaga ng pabuya, ito ay bilang pagma­ma­lasakit ng mga residente sa sinapit ng paslit para sa ikalu­lutas ng kaso at makasuhan ang taong gumawa ng ka­rumal-dumal na krimen.

Ayon pa kay Bautista, naki­pag-ugnayan na rin umano sa pulisya ang mga opisyal ng iba’t-ibang barangay at ang Depart­ment of Social Welfare and Development (DSWD) para ma­lutas ang kaso. 

Nakikipag-ugnayan na rin ang pulisya sa ilang opisyal ng mga asosasyon ng tricycle at pedicab sa iba’t ibang ba­rangay dahil sa hinalang isina­kay ang paslit sa isang pedi­cab bago ito itinapon sa naturang basurahan.

Matatandaan na isang Lito Catupay, residente sa natu­rang lugar ang nakapuna sa ka­tawan ng bata na tinatayang 2 anyos, semi-kalbo ang gupit ng buhok at walang salawal na nakahan­dusay sa kumpol ng mga basurahan.  

Sa imbestigasyon ng pulis­ya, tadtad ng pasa ang ka­tawan ng biktima na hini­hinalang mi­naltrato na nag­resulta sa kan­yang kama­tayan.