Trak vs motorsiklo: 2 todas

Dalawang magkaang­kas sa isang motorsiklo ang kapwa nasawi maka­ra­ang sumalpok sila sa isang rumaragasang 10-wheeler truck kahapon ng madaling-araw sa Que­zon City.

Nakilala ang mga na­sawi na sina Joel Nera, 20, ng #62 Republic Ave­nue, Brgy. Fairview, Que­zon City at ang angkas nito na nakilala pa lamang sa alyas na Boy.

Sa ulat ng Quezon City Traffic Sector 5, dakong alas-2:30 ng madaling- araw nang maganap ang aksidente sa fly-over sa panulukan ng Common­wealth at Tandang Sora Avenue.

Nabatid na kapwa walang suot na helmet ang mga biktima na sakay ng isang Honda motor­cycle (OS-4732) nang sumalpok sila sa Isuzu cargo truck (PMZ-715) na minamaneho ni Demetrio Composo. Nagawa pang maisugod sa East Avenue Medical Center ang da­lawa ngunit hindi na rin umabot ng buhay dahil sa tindi ng pinsalang tinamo ng kanilang katawan.

Kusang-loob namang sumuko sa pulisya si Composo na nakatak­dang sampahan ngayon ng kasong reckless im­prudence resulting to double homicide.

Sa hiwalay na insiden­te dakong ala-1 ng mada­ling-araw, malubha na­mang nasugatan sina Jester de Vera, 23, isang inhinyero, ng SSS Village, Marikina City; at manager na si Ronaldo Dagaje, 32, ng UP Diliman, Quezon City nang sumalpok na­man ang sinasakyan nilang Toyota Corolla Altis (XGS-115) sa concrete bar­rier na inilagay ng Metro­politan Manila De­velopment Authority sa Commonwealth Avenue.

Agad namang na­isugod sa EAMC ang dalawa na hinihinala sa inisyal na imbestigasyon na nakainom ng alak.