2 holdaper sugatan sa pulis

Nabigo ang dalawang ki­la­bot na holdaper sa kanilang pambibiktima matapos na tamaan ng bala sa isang barilan sa pagitan ng pulisya, kama­kalawa ng gabi sa Que­zon City. Nakilala lamang ang dalawang sugatang sus­pek na sina Joven de Leon, ng Las Piñas City at Marvin Morta ng Palipa­ran, Dasmariñas, Cavite. Ayon sa ulat, naganap ang engkuwentro dakong alas-6 ng gabi sa Tomas Morato St., ng naturang lungsod.

Nabatid na unang hi­nablot ng dalawang sus­pek na sakay ng isang motorsiklo ang bag ng isang babae habang pa­patawid ito ng naturang kalsada. Agad namang naka­hingi ng saklolo ang bik­tima sa pulisya na tiyem­pong nagpapatrulya sa naturang lugar kaya nag­karoon ng habulan. Na­korner naman ng mga pulis ang mga suspek na una umanong nagpapu­tok sa mga alagad ng batas.  Dito magkasunod na tumimbuwang ang dalawa matapos na gu­manti ng putok ang mga pulis. Mabilis namang isinu­god sa pagamutan ang dalawang suspek at ino­obserbahan ngayon sa East Avenue Medical Center.  (Danilo Garcia)