Bahay ng youth offender Itatayo sa Metro Manila

Inatasan kamakailan ng Department of Inte­rior and Local Govern­ment ang mga alkalde ng Metro Manila na magtayo ng 24-oras na bahay para sa mga ka­bataang nasasangkot sa mga krimen upang tuluyang maialis ang mga ito sa mga kulu­ngan kasama ang mga matatandang kriminal.

Sinabi ng DILG sa pamamagitan ng isang memorandum ni DILG Secretary Ronaldo Puno na dapat madaliin na ang pagtatayo ng naturang mga bahay para sa mga “children-in-conflict-with-the-law.

Sinabi ni Puno na isa lamang “short term” ang naturang mga pasilidad para sa pangangalaga sa mga bata na nag­hihintay ng disposisyon ng kanilang kaso buhat sa korte o ang utos na ilipat na sila sa panga­ngalaga ng Department of Social Welfare and Development.

Nabatid sa pag-aaral na libu-libong mga kabataang sangkot sa krimen ang nakaka­ranas ng paghihirap sa mga city at provincial jails kung saan sila  idiniditine kasama ang mga matatandang sus­pek sa mga krimen.

Hindi umano naka­katulong ito sa mga ka­bataan na sa halip na mailigtas ay nalulubog pa lalo sa kriminalidad.

Nakasaad sa Re­public Act 9344 o Juve­n­ile Justice and Welfare Act na obligasyon ng mga pinuno ng local government units ang pagtatayo ng naturang mga pasilidad para sa mga kabataan. (Danilo Garcia)