Pacquiao sisingilin na sa utang sa Maynila

Matapos isnabin ni Peo­ple’s Champ Manny Pac­quiao ang hero’s welcome na inihanda sa kanya ng pamahalaang lungsod ng Maynila,  sini­singil na ito  ngayon ng city government sa  pagkaka­utang sa buwis ng pag-aari niyang res­taurant na dating nakatayo sa  Bay­walk ngunit ipinabu­wag ni Manila Mayor Al­fredo Lim.          

Nabatid na umaabot sa P92,000 pa ang hindi naba­bayarang buwis ng Knock­out Restaurant ni Paquiao sa Manila City Government.          

Naniniwala naman si Lim na posibleng hindi alam ni Pacquiao na may  kulang pa itong bayaring buwis dahil sigurado naman ito na ang kan­yang accountant o ma­nager ang nag-aasikaso sa mga ganitong usapin.          

Samantala, sa kabila naman ng pagtanggi ni Pacquiao sa iginayak na motorcade para sa kanya, inihayag ni Lim na nana­natiling adopted son pa  rin ito ng Maynila.          

Todo depensa rin naman si Lim kung bakit hindi naipalabas ng libre sa mga sports complex sa Maynila ang katatapos na laban ni Pacquiao kay Me­xican boxer Marco Antonio Barrera.

Pali­wa­­nag ng alkalde,  aabot sa P1.2 milyon (P400,000 bawat isa sa tatlong sports complex) ang ga­gastusin ng local govern­ment na pam­bayad sa  Solar Sports para sa pag­papalabas ng laban kaya’t nagdesisyon silang  huwag na lamang itong ituloy.

Nais umano nilang gastusin na lamang para sa mga pangunahing pa­nga­ngailangan ng mga Mani­lenyo ang nasabing halaga. (Doris Franche)