MPD police bawal mag-display ng alahas

Mahigpit nang ipinagbabawal ng pamunuan ng Manila Police District (MPD) sa mga tauhan nito ang pagsusuot ng mga alahas.

Ayon kay  MPD director  Chief Supt. Rogelio Rosales ang nabang­git na kampanya ay upang maibalik umano sa mga pulis ang magandang imahe ng mga ito, partikular na ang mga pulis-Maynila. Ipinaliwanag ni  Rosales na hindi magandang tignan ng publiko ang isang nakaunipormeng pulis habang mistulang sampayan ng mamahaling  alahas ang kanyang katawan.  Aniya, nagkakaroon umano ng ideya  ang publiko na isang kotong cop ang mga pulis na namumutiktik sa alahas at ito umano ay nakakawala ng respeto. Gayunman, hindi naman tinututulan ni Rosales ang pagsusuot ng alahas kung mayroon din naman okasyon na kinakailangan magsuot nito ang isang pulis. Bukod sa hindi pagsusuot ng alahas, ipinag-utos din ni Rosales ang pagsusuot ng uniporme ang kapulisan habang sila ay naka-duty. (Grace dela Cruz)