Aviation Police kakasuhan

Ipaghaharap ngayong araw na ito ng kasong  murder at child abuse ang isang pulis na nambugbog at nakapatay sa  isang bina­tilyo na kanyang  inaresto noong Setyembre 29 sa San Andres Bukid Maynila.

Sinabi ni  Det. Jaime Gon­zales ng Manila Police District-homicide section na personal na itinuro ng mga testigo  si PO2 Julio Ezzey Mar­quez ng 1st Police Center for Aviation Security bilang isa sa mga sus­pek na umaresto at  bu­mug­bog kay Bernardo  Bandejas, 15, ng Pulido compound, Pa­na­paan 4 Bacoor, Cavite sa San Andres. Ikinamatay ng bik­tima ang naturang pam­bu­bugbog.

Ipinaliwanag naman ni  Gonzales na nasa panga­nga­laga na ng kanyang superior officer sa Aviation Com­­mand base si Mar­quez.

Nilinaw pa rin ng pulisya na maituturing na umanong  “con­sumated” na ang kaso ni Mar­quez bago pa man ito kinilala  kaya sa korte na lamang nito sasagutin ang akusasyon laban sa kanya.

Una nang sinampahan ng kasong murder at child abuse ang isa pang suspek na si Joel Hizo, 45, Brgy Tanod ng Brgy 763, Zone 83,  District 6.

Matatandaan na inaresto si Bandejas kasama sina Sher­win Asistol, 16, at  Vir­gilio Celis, 16, dahil sa umano’y  pagna­nakaw sa bisik­leta ng isang Jaime Marquez, 28. (Grace Amargo-dela Cruz)