Trader na may-ari ng tone-toneladang ‘hot meat’ kinasuhan

Pormal ng kinasuhan kahapon sa Pasay City Prose­cutor’s Office ang isang negosyanteng Tsinoy at may-ari ng tone-toneladang nangangamoy at inaamag na pata ng baboy na nasabat kamakailan  sa lungsod ng Pasay.

Kasong paglabag sa Republic Act 7394  o con­sumers  act of the Philippines  at R.A 9290 o meat inspector code of the Philippines ang isinampa laban kay Susan Co, ng #220 F. Sanchez St. Pasay City.

Ito ay matapos ang masusing pagsusuri na isina­gawa ng Task Force Bantay Karne  ng National Meat Inspection Service (NMIS).

Ayon kay Dr. Ronald Bernasor, hepe ng Veterinary Office ng Pasay City, nabatid na  si Co ay nabigong mag­­pakita ng meat inspection certificate para sa mga nakum­piskang mabahong  karne ng baboy,  bukod pa sa hindi refri­gerated van ang pinagkargahan ng mga ito habang ibini­biyahe at idi-deliver sa mga palengke ng nasabing lungsod.

Magugunitang nakumpiska sa loob ng 40-footer container van na may plakang CVZ-494 na nasabat sa kahabaan ng Cuneta St., Park Avenue, Pasay City dakong ala-1:40 ng madaling-araw. (Lordeth Bonilla)