Tiyo kinatay ng pamangkin

Tatlumpung saksak sa iba’t ibang bahagi ng katawan ang tumapos sa buhay ng isang 63-anyos na lalaki makaraang pag­sasaksakin ito ng kan­yang lasing na pamangkin na nag-aakusa sa una na siyang nagpakulam sa kanyang ama kaya ito namatay kamakalawa ng gabi sa Marikina City.

Kinilala ang nasawing biktima na si Jaime Mon­tuerto, kakadating lang mula sa Catbalogan, Samar at pansamanta­lang nanunuluyan sa 1 Langka St. Brgy. Malan­day ng nasabing lungsod.

Agad namang na­aresto ang suspek na pa­mang­kin na si Michael Abenir, residente rin ng na­sabing barangay.

Ayon kay P/Insp. Jose Salazar, hepe ng Criminal Investigation Division ng Marikina Police, naganap ang insidente dakong alas-9:35 ng gabi sa ha­rapan ng bahay na tinutu­luyan ng biktima matapos na dumalaw ang suspek dito na lasing  mula sa isang inuman ng mabali­taan na nagbakasyon mula sa probinsya ang tiyo.

Matapos na magkita at magkamayan ang mag- tiyuhin ay inaya ng suspek sa labas ng bahay ang biktima at pagdating doon ay agad na kinuha ang patalim na nakatago sa beywang at walang sabi-sabing pinagsasaksak ni Abenir ang kanyang tiyu­hin sa likurang bahagi at hindi pa nakuntento sinun­dan pa ito ng sunud-sunod na saksak sa dibdib ng humarap ito sa kanya.

Matapos ang insidente ay nagtangka pang tuma­kas ang suspek subalit na­aresto din ito ng mga rumespondeng tanod at mga pulis habang sinubu­kan pang itakbo sa paga­mutan ang biktima subalit idineklara na itong dead on arrival.

Sa himpilan ng pulis­ya, sinabi ng suspek na kaya niya nagawang pa­tayin ang kanyang tiyuhin ay para maipaghiganti nito ang kanyang tatay na nasawi dahil ipinakulam umano ito ng tiyo noong nasa Catbalogan, Samar pa ang mga ito.