Pinaghahanap ngayon ng mga awtoridad ang isang magkapatid na babae na hinihinalang nag-iwan ng patay na fetus sa loob ng inidoro ng palikuran sa isang dormitoryo, kahapon ng umaga sa Quezon City.
Nakilala ang hinahanap na estudyante na si Christine Yatco at ang hindi pa nakikilalang kapatid nito na hinihinalang nag-iwan sa limang buwang fetus na posibleng sadya nitong inilaglag sa palikuran ng Episcopal Diocese of Central Phils. Ladies Dormitory sa may E. Rodriguez Avenue, ng naturang lungsod.
Sa ulat ng Quezon City Police District (QCPD), dakong alas-6 ng umaga nang madiskubre ng janitress na si Aileen Bolangi ang naturang fetus nang kanyang linisin ang banyo ng mga babae matapos na may magreklamo na barado ang inodoro nito.
Isang fetus pala ang nakabara sa inidoro nang kanya itong linisin. Agad na ipinagbigay-alam ni Bolangi ang pagkakatagpo sa fetus sa pamunuan ng dormitoryo na siya nang humingi ng tulong sa pulisya.
Sa pagtatanong ni SPO4 Gerry Abad, imbestigador, nabatid na pinatuloy ni Yatco ang kapatid nitong babae na nahalata ng mga kasamahang boarders na nagdadalang-tao ilang araw bago makita ang fetus.
Hindi na mahagilap ngayon ng mga kasamahang boarders ang magkapatid na Yatco matapos na lumisan na ang mga ito dala ang lahat ng gamit kung saan hinihinala na inilaglag ang naturang fetus. Dinala ang fetus sa Prudential Funeral Homes.