Bilang na ang mga araw

Binalaan ng pamunuan ng Manila Police District ang mga umano’y  mga “kotong cops” at abusa­dong  pulis-Maynila na bilang na ang araw ng mga ito ma­tapos na buhayin ang isang grupo ng kapulisan na mang­­huhuli sa mga police scalawags.

Ipinaliwanag ni MPD Director Senior Supt. Danilo  Abarzosa na nagtatag sila ng “Task Group Katapat” na mangangasiwa sa pag-monitor at pag-iimbestiga sa mga tiwaling pulis.

Itinatag ang naturang  grupo bunga ng  mga report na natatanggap  ng MPD hinggil sa illegal na gawain ng mga ilang pulis na nag­bibigay ng hindi magandang imahe at  mababang pagti­ngin ng mga tao sa kapu­lisan.

Maliban sa pagsasagawa ng imbestigasyon at  pag­momonitor, idodokomento rin ng grupo ang iligal na akti­bidad ng naturang mga pulis na basehan sa pagsa­sampa ng kaso laban sa mga ito.

Mamumuno sa TG Kata­pat si Chief Insp. Dominador Arevalo, Jr. na nagsabing ma­­giging matagumpay la­mang ang Task Group sa pa­kikipagtulungan ng pub­liko.

Anumang impormasyon hinggil sa mga tiwaling pulis ay maitatawag sa cellphone no. 09198939848 at telephone no. 5361789. Lahat ng tawag ay mananatiling confidential. (Grace dela Cruz)