Dalawang itinuturing na most wanted na miyembro ng notoryus na Waray-Waray kidnap for ransom (KFR) gang ang nasakote ng mga operatiba ng Police Anti-Crime Emergency Response (PACER) sa magkakahiwalay na operasyon sa Pasig and Pasay City. Sa ginanap na press briefing kahapon sa Camp Crame, kinilala ni PNP Chief Director General Oscar Calderon ang mga nasakoteng suspect na sina Freeman Bagares, alyas Priman at Ricardo Banaay, alyas Tatang.
Ayon kay Calderon, na sina Bagares at Banaay ay kapwa natukoy na miyembro ng notoryus na Waray-Waray KFR gang kung saan ang mga ito ay may tig P 250,000 patong sa ulo bawat isa. Sinabi ni Calderon na si Bagares ay nasakote ng mga operatiba ng PACER sa Brgy. Kalawaan, Pasig City, habang si Banaay ay nahuli naman sa Manlunas St., Villamor Air Base sa Pasay City.
Ang dalawa ay naaresto sa bisa ng warrant of arrest sa kasong kidnapping for ransom na inilabas ni Judge Narbo Noblejas ng RTC Branch 69, Binangonan Rizal at Judge Norberto Quisumbing ng RTC Branch 21 ng Imus, Cavite.
Nabatid na ang dalawa ay kapwa sangkot sa 12 kaso ng kidnapping sa Metro Manila, Rizal at Cavite simula 2001. Ayon kay Calderon, ang pagkakaaresto sa dalawa ay bunsod na rin ng pakikipagtulungan ng komunidad sa PACER.